Eze 1 | NdeIBE | STEP | Ngomnyaka wamatshumi amathathu, ngenyanga yesine ngosuku lwesihlanu, lapho ngangiphakathi kwabathunjwayo, eduze komfula uKhebhari, amazulu avuleka ngabona umbono kaNkulunkulu.

Ezekiel 1

Izidalwa Eziphilayo LeNkazimulo KaJehova

1 Ngomnyaka wamatshumi amathathu, ngenyanga yesine ngosuku lwesihlanu, lapho ngangiphakathi kwabathunjwayo, eduze komfula uKhebhari, amazulu avuleka ngabona umbono kaNkulunkulu.

2 Ngosuku lwesihlanu lwenyanga – ngomnyaka wesihlanu wokuthunjwa kwenkosi uJehoyakhini 3 ilizwi likaJehova lafika kuHezekheli umphristi, indodana kaBuzi, phansi komfula uKhebhari elizweni lamaBhabhiloni. Khonapho isandla sikaJehova sasiphezu kwakhe.

4 Ngakhangela, ngabona isiphepho sisiza sivela enyakatho – kuliyezi elikhulukazi lokuphazima kombane njalo lizungezwe yikukhanya okubenyezelayo. Phakathi laphakathi komlilo kwakungathi yinsimbi evuthayo, 5 njalo phakathi komlilo kwakulokwakungathi yizidalwa ezine eziphilayo. Ngokukhangeleka isimo sazo sasingesomuntu, 6 kodwa ngasinye sazo sasilobuso obune lezimpiko ezine. 7 Imilenze yazo yayiqondile; izinyawo zazo zinjengezethole njalo zinkanyazela njengethusi elilolongiweyo. 8 Ngaphansi kwezimpiko zazo emaceleni azo amane zazilezandla zomuntu. Zonke zone zazilobuso lezimpiko, 9 njalo izimpiko zazo zazithintana. Esinye lesinye sazo saya phambili; kaziphendukanga ekuhambeni kwazo.

10 Ubuso bazo babukhangeleka kanje: Esinye lesinye sazo sasilobuso bomuntu, njalo eceleni langakwesokudla esinye lesinye sasilobuso besilwane, ngakwesenxele silobuso benkabi; njalo ngasinye sasilobuso bengqungqulu.

11 Babunjalo ubuso bazo. Izimpiko zazo zazichayekele phezulu; ngasinye silezimpiko ezimbili olunye luthinta uphiko lwesinye isidalwa emaceleni womabili, lezimpiko ezimbili zigubuzele umzimba waso. 12 Esinye lesinye saya phambili. Loba kungaphi lapho umoya owaya khona lazo zaya khona zingaphenduki ekuhambeni kwazo. 13 Isimo sezidalwa eziphilayo sasinjengamalahle avuthayo omlilo loba njengezibane. Umlilo wahamba usiya phambili lasemuva phakathi kwezidalwa; wawukhazimula, njalo umbane uphazima uphuma kuwo. 14 Izidalwa zagijima zisiya emuva laphambili njengokuphazima kombane.

15 Kwathi lapho ngizikhangele izidalwa eziphilayo, ngabona ivili phansi eceleni kwesidalwa ngasinye silobuso obune. 16 Nansi isimo lokwakhiwa kwamavili: Ayecazimula njengekhrisoli, njalo wonke womane ayefanana. Elinye lelinye lalingathi lenziwa lanquma kwelinye ivili. 17 Ekuhambeni, ayesiya loba kuliphi lamacele amane lapho izidalwa ezazikhangele khona, njalo amavili ayengaphenduki lapho izidalwa zihamba.

18 Amarimu awo ayephakeme njalo esesabeka, njalo womane amarimu ayelamehlo indawo yonke.

19 Lapho izidalwa eziphilayo zihamba, lamavili eceleni kwazo ayehamba, njalo lapho izidalwa eziphilayo ziphakama emhlabathini amavili lawo ayephakama lazo. 20 Loba kungaphi lapho umoya owaya khona lazo zaya khona, njalo lamavili ayephakama lazo, ngoba umoya wezidalwa eziphilayo wawusemavilini.

21 Kwakusithi izidalwa zingahamba lawo ahambe, kuthi izidalwa zingema lawo ame; njalo kuthi lapho izidalwa ziphakama emhlabathini lawo aphakame lazo, ngoba umoya wezidalwa eziphilayo wawusemavilini.

22 Ngaphezu kwamakhanda ezidalwa eziphilayo kwakwendlaleke okwakungathi ngumkhathi, kucazimula njengongqoqwane, njalo kusesabeka. 23 Ngaphansi komkhathi izimpiko zazo zazelulekele olunye kolunye, njalo esinye lesinye sasilezimpiko ezimbili ezembese umzimba waso. 24 Lapho izidalwa zihamba ngezwa umsindo wezimpiko zazo, unjengokuhlokoma kwamanzi ahamba ngesiqubu, njengelizwi likaSomandla, njengokuxokozela kwebutho. Lapho sezimi, zehlisa izimpiko zazo.

25 Emva kwalokho kweza ilizwi elavela ngaphezu komkhathi ngaphezu kwamakhanda azo lapho zazimi izimpiko zazo zehlisiwe.

26 Ngaphezu komkhathi phezu kwamakhanda azo kwakulokwakungani yisihlalo sobukhosi esenziwe ngesafire, njalo ngaphezulu esihlalweni sobukhosi kwakulolutho olwalufana lomuntu. 27 Lokho ngakubona kokwakungathi lukhalo lwakhe kusiya phezulu ekhanya angathi yinsimbi evuthayo, kungathi kugcwele umlilo, njalo kusukela lapho kusiya phansi wayengathi ngumlilo, njalo ehonqolozelwe yikukhanya okucazimulayo. 28 Ukukhanya okucazimulayo okwakumzungezile kwakunjengomchilo wamakhosikazi emayezini ngosuku lokuna kwezulu. Lokhu kwakuyisimo sesifanekiso senkazimulo kaJehova. Ngathi ngikubona ngawela phansi ngobuso, ngasengisizwa ilizwi lalowo owayekhuluma.